أنا عايز أحتج وأندد بخصوص حاجة مقرفة في عاداتنا وهي جواز الصالونات. مشكلة النوع دا من الجواز إن الاختيار فيه بيكون وسايط وتوصية. الشاب بسبب تقاليد المجتمع مش عارف يقابل البنت بشكل طبيعي وعادي ومش قادر يكلمها ويحكم عليها ويتعرف على شخصيتها وأخلاقها وعقليتها إلخ فبيحتاج للتوصية ويشوف أمه أو أخته يسألوا الأقارب والصديقات والزميلات ويفكروا له في واحدة شافوها هنا أو هناك. غالبا وبفضل حب ناس لعمل الخير بيرشحوا بنت هم ميعرفوهاش شخصيا على إنها أنتيمهم وأخلاقها تمام وفل.
انت وحظك : حسب البنت المرشحة لتكون زوجة المستقبل وأهلها إذا كانوا متفتحين ممكن البنت تقابلك برا في وجود أطراف محايدة وإلا هتضطر تتشيك وتلبس البدلة الرسمي وتروح تعمل زيارة لبيتها عشان بس تشوف شكلها وطبعا هتصطحب معاك الوالدة على الأقل عشان ترغي مع أمها وانت بقى تقعد تبص لها بكسوف وهي تبص لك من تحت لتحت وممكن ترمي كلمة وسط الحوار اهو تشوف شكلك وانت بتتكلم وانت تسمع صوتها مسرسع ولا لا! سحقا لهذا المجتمع.
متروحش يابني: نصيحتي للشاب لو أسرة البنت مكلكعة ومانعين تبقى أول اللقاءات برا البيت في مكان عام يبقى متدخلش بيتهم أصلا وشوف اللي بعدها والله يعينك أصلا على فكرة الصالونات دي.
صعب الشاب والبنت يكون أول قرار بخصوص التناسب والاعجاب في الشكل الخارجي من غير ما ياخدوا راحتهم في الجدال والنقاش والتعارف وبدون وجود القرشانات من النساء.
ولو حظك فل بقى : لو حظك فل ويخشى عليك من الحسد هتعرف تشوف الانسة برا وهيكون الحركة القرعة كالاتي هي تعمل نفسها متعرفش وخارجة تتمشى مع صاحبتها عادي وطبعا لابسة شيك ومستعدة بس هي متعرفش وانت تخرج مع اختك وتتمشوا وكأنك متعرفش برضو واختك تقابل صاحبتها ويسلموا على بعض وهم غالبا وسطاء الجوازة وانت تبص للبنت وهي تلمحك وانتوا عاملين مش واخدين بالكم وبعد ثولني معدودة يطلبوا منك تصدر القرار ها ايه رأيك! نعم؟ صباحكم كروتة.
ولو حصل قبول: بعد حصول قبول عاجبك شكلها وشكلك عاجبها نبدأ بقى التمهيد للزيارة المنزلية، طب انا عايز اقابلها تاني وتالت برا عشان اعرف شخصيتها وافكارها لا لا لا انت فاكر ايه دي بنت ناس ولازم تفهم انها محكومة ببيت اخطبها واتعرفوا على بعض براحتكم ولو محصلش اعجاب فركشوا عادي.
وبعدين شكلك بقى وحش البنت عاجباك وعايز تقابلها برا بعيد عن البيت انت مش جاد ولا ايه
طيب جميل نروح البيت بس متروحش لوحدك هتروح مع ماما وبابا بقى وانت متخيل ان رايح تعرف البنت اكثر وتحكم عليها اكثر لكن الحقيقة ان ابوها وامها عايزين يشوفوك ويحكموا عليك وهيقعدوا يكلموك ويسألوك عشان يحددوا قرارهم لأنهم شايفين بنتهم عيلة وممكن تجيب لهم اي واحد ولازم يفرزوك شخصيا فتلاقي الزيارة انتهت في تعارف أسري المفروض انه يكون بعد تعارف العروسين مش قبله لأن ايه فايدة اعجاب الاسرتين ببعض وانا لسا محددتش موقفي من البنت نفسها
اتحسبت عليك مقابلتين يا معلم خش عالثالثة. بعد الزيارة اذا الناس حسوا ان الاسرة مشرفة وأمورها تمام بيكون في اتصالات تليفونية لمتابعك تحديد موعد ثالث وفي الثالث طبعا انت بتحس بكسوف واستعجال نتفق بقى رايح جاي عالناس وهم مستنيين ينجزوا وانت كل دا مش عارف تقعد معاها قعدة عدلة من غير كسوف ومن غير وجود اطراف فضولية
القعدة الثالثة عادة تركز على النقاش في الماديات من مقدم المهر ومؤخره والشبكة والعفش والشقة ومساحتها وموقعها الخ! طب يا جدعان انا لسا والله لم انفرد بالبنت فعلى أي أساس قاعدين نهري في هتدفع كام لما تطلقها؟ يعني مش لما اقتنع بيها واحس ان هي دي البنت اللي عايزها وبحلم بيها؟ الموضوع بيقلب بتجارة لا المهر قليل دا اختها واخدة كذا المؤخر هنزوده الخ طيب نقاش دا لازم له اولا اكون مقتنع بيها اوي وداخلة دماغي ونبتدي بقى شاريين بعض لكن واحدة لسا معرفهاش! في بنت اخلاقها تخليك تخش رامي مليون مؤخر وانت متطمن لانك حاببها واخلاقها عالية وعارفها كويس لكن ادوني فرصة اعرف بنتكم وناخد على بعض عشان اعرف انا بفاصل في ايه
اتفقوا؟ ألف مبروك نقرا الفاتحة لبسها الخاتم وابدأ مسيرة الهدايا في عيد الام وعيد ميلادها والمناسبات الدينية من عيد فطر واضحى واسراء ومعراج ورمضان الخ
طب يا مجتنع انا عايز قبل ما اشيل هموم المصاريف والتكاليف اخد فترة من التعارف الخالص التعارف لله الاستكشاف انسان بيصاحب انسان ويعرفه ويفهمه مش كل حاجة ادفع ادفع هات والناس هتقول والواجب تعمل كذا عايز اجيب هدية بمزاجي وعن حب مش بزق المجتمع ومش وانا حاسسها عبء عايز اروح لابوها اقول عشان خاطري توافق انا معجب اوي ببنتك ونفسي تكون شريكة حياتي عن اقتناع تام مش باستعجال الجميع وكروتتهم.
عايز اتعرف عليها على مهلي واروح اجيب الهدية وتبقى مفاجأة سعيدة مني لها مش واجب اجتماعي عليا
عايز احس انها بنت ناس وأخلاق ومن بيت محترم من غير ما أحس انه دا عامل حاجز بين تعارفنا ومن غير ما احس ان دا مصطنع وبيتظاهروا بيه بأفورة لاتمام جوازة وخلاص.
ويبقى السؤال اللي بيطرح نفسه هو: هل لو البنت اللي انت وافقت عليها تحت ضغط من نفسك باستعجالها وتحت ضغط المجتمع في الفصل بين الجنسين وضغط كروتة الصالونات هل البنت دي لو كانت زميلتك في الكلية مثلا وسط مجموعة بنات كنت هتحس ان في حاجة كعبلتك ووقعت على ضهرك وطبيت في حبها من الاعجاب بها في شكلها وشخصيتها ولبسها وطريقة كلامها وثقافتها الخ؟ ظن ان أغلبنا هيقول لا
وللحديث بقية إن شاء الله
ليست هناك تعليقات:
إرسال تعليق